जुम्ला बजारमा नयाँ गिफ्ट तथा होम डेकोर व्यवसाय सञ्चालनमा आएको छ। खलंगा बजारको कृष्णमन्दिर नजिक ‘चन्दननाथ गिफ्ट सप एन्ड होम डेकोर’ सञ्चालनमा आएसँगै स्थानीय उपभोक्ताका लागि उपहार तथा घर सजावटका सामग्री खरिद गर्ने अर्को विकल्प थपिएको हो।

२५ वर्षीया सविना बुढाथापाले सञ्चालनमा ल्याएको उक्त पसलको आइतबार उद्घाटन गरिएको हो। करिब आठ लाख रुपैयाँ लगानीमा सुरु गरिएको व्यवसायमा विभिन्न अवसरमा उपहारका रूपमा प्रयोग गर्न सकिने सामग्रीसँगै घर सजावटका सामग्री उपलब्ध गराउने उद्देश्य राखिएको छ।

सविनाको शैक्षिक पृष्ठभूमि भने व्यवसायभन्दा फरक छ। उनले वन विज्ञान विषय अध्ययन गरेकी छन्। अध्ययन सकेपछि आफ्नै क्षेत्रमा केही नयाँ काम गर्ने सोचका साथ व्यवसाय सुरु गरेको उनी बताउँछिन्।

‘केही नयाँ गरौँ भन्ने सोच आयो,’ व्यवसाय सुरु गर्नुको कारणबारे सविनाले भनिन्, ‘त्यही सोचअनुसार गिफ्ट सप एन्ड होम डेकोर सञ्चालनमा ल्याएकी हुँ।’

जुम्लामा पछिल्लो समय युवाहरू आफ्नै ठाउँमा रहेर स्वरोजगार तथा व्यवसायमा जोडिन थालेका छन्। जागिर खोज्नेभन्दा आफ्नै सीप, रुचि र लगानीका आधारमा व्यवसाय सञ्चालन गर्ने क्रम बढ्दै गएको अवस्थामा सविनाको नयाँ प्रयास पनि त्यसैको एउटा उदाहरण हो।

वन विज्ञान पढेकी सविनाले आफ्नो अध्ययनको क्षेत्रभन्दा फरक व्यवसाय रोजेकी हुन्। उनका लागि यो व्यवसाय व्यापार सुरु गर्ने निर्णय मात्र नभएर नयाँ क्षेत्रमा सम्भावना खोज्ने प्रयास पनि हो। स्थानीय बजारमा आवश्यकताअनुसारका सामग्री उपलब्ध गराउँदै व्यवसायलाई विस्तार गर्ने उनको लक्ष्य छ।

कृष्णमन्दिर नजिकै रहेको पसलले बजार क्षेत्रमा आउने स्थानीय बासिन्दा तथा ग्राहकलाई लक्षित गरेको छ। जन्मदिन, विवाह, वार्षिकोत्सव, विभिन्न चाडपर्व तथा विशेष अवसरमा आफन्त र साथीभाइलाई उपहार दिन चाहने ग्राहकका लागि गिफ्ट सामग्री उपलब्ध गराउनु पसलको मुख्य उद्देश्य रहेको सविनाले बताइन्।

घर तथा कोठा सजावटमा प्रयोग हुने सामग्रीको माग बढिरहेको अवस्थामा गिफ्टसँगै होम डेकोरलाई पनि व्यवसायको हिस्सा बनाइएको हो। यसले ग्राहकलाई एउटै स्थानबाट उपहार र सजावटका सामग्री छनोट गर्न सहज हुने उनको विश्वास छ।

स्थानीय बजारमा नयाँ व्यवसाय सुरु गर्नु चुनौतीपूर्ण भए पनि सम्भावना पनि उत्तिकै रहेको सविनाको बुझाइ छ। करिब साढे सात लाख रुपैयाँ लगानी गरेर सुरु गरिएको व्यवसायलाई आगामी दिनमा ग्राहकको आवश्यकता र रुचिअनुसार थप व्यवस्थित तथा विस्तार गर्ने उनको योजना छ।

सविनाले आफ्नै ठाउँमा नयाँ व्यवसाय सुरु गरेर दिएको सन्देश भने स्पष्ट छ, पढाइ सकेपछि रोजगारी खोज्नु मात्र विकल्प होइन, आफ्नो रुचि र सम्भावना पहिचान गरेर उद्यमशीलताको बाटो पनि रोज्न सकिन्छ।