गुठीचौर गाउँपालिकाको -१ को घाट लेक प्रकृतिको यस्तो भूगोल हो, जहाँ पुग्दा थकान मेटिन्छ र आँखाहरू अलौकिक दृश्यमा हराउँछन्। समुद्री सतहदेखि ४,८६० मिटरको उचाइमा आकाशकै रङ सापट लिएर बसेको ‘आकासे ताल’ र ४,२८० मिटरमा अवस्थित पवित्र ‘दूध कुण्ड’ जुम्लाको हिमाली पर्यटनका अनमोल निधि हुन्।
हिउँदमा सेताम्य र बर्खामा बैजनी–पहेंला हिमाली फूलहरूले सजिने यी तालहरू केवल आँखा लोभ्याउने गन्तव्य मात्र होइनन्, स्थानीय धार्मिक आस्थाका धरोहर पनि हुन्।
उकालो–ओरालो, विशाल पाटन, भेडीगोठ र छिनछिनमै बदलिने मौसमको सास्ती भुलेर पुग्ने जो-कोहीलाई यहाँको शान्तिले मोहित बनाउँछ। प्रचारप्रसारको पर्खाइमा रहेका यी दुई हिमताललाई फोटोग्राफर सरोज शाहीले आफ्नो क्यामेरामा यसरी कैद गरेका छन्।
गुठीचौरको घाट लेकस्थित आकासे ताल पुग्दा प्रकृतिले आफ्नो भव्य रूप प्रदर्शन गरेझैं लाग्छ। बादलका टुक्राहरू तालको कञ्चन पानीमा तैरिरहँदा यहाँ पुग्ने जो-कोही पदयात्री मोहित हुन्छन्।
४,२८० मिटरमा अवस्थित दूध कुण्ड। स्थानीय जनविश्वास अनुसार यो ताल धार्मिक रूपमा अत्यन्तै पवित्र मानिन्छ। शान्त वातावरण, वरिपरि फैलिएका चट्टानी पहाड र कञ्चन जलधाराले यहाँको वातावरणलाई ध्यानमग्न बनाउँछ।
कठिन तर रोमाञ्चक पदमार्ग। तालसम्म पुग्ने बाटोमा भेटिने विशाल पाटन, हिमाली जडीबुटी र स्थानीय गोठालाहरूको जीवनशैलीले यात्रालाई जीवन्त बनाउँछ। हिमालको फेदीमा चर्दै गरेका भेडाका बथानले यात्राको थकान भुलइदिन्छन्।
चट्टानको काखमा शान्त ताल। वरिपरि नाङ्गा पहाड र हिउँका ढिकाहरूको बीचमा अवस्थित यी तालहरूले कर्णालीको हिमाली जनजीवन र भूगोलको वास्तविक कठोरता अनि सौन्दर्यलाई एकैसाथ उजागर गर्छन्।
स्वदेशी तथा विदेशी पर्यटक पर्खिँदै। पदमार्गको व्यवस्थित विकास, आवास सुविधा र प्रचारप्रसार हुन सके आकासे ताल र दूध कुण्ड कर्णालीकै प्रमुख ट्रेकिङ गन्तव्य बन्न सक्ने सम्भावना बोकेका छन्।
दुर्गम भूगोल, उच्च हिमाली हावापानी र सीमित पूर्वाधारका बाबजुद घाट लेकका यी हिमतालहरू साहसिक पदयात्रा र प्रकृतिका प्रेमीहरूका लागि स्वर्गीय अनुभव हुन्। फोटोग्राफर सरोज शाहीका यी तस्बिरहरूले जुम्लाको लुकेको सौन्दर्यलाई राष्ट्रिय–अन्तर्राष्ट्रिय तहसम्म पुर्याउन पुलको काम गरेका छन्।
(तस्बिरहरू : सरोज शाही)
