नयाँ सडक, सिचाइ कुलो, शैक्षिक सुविधा, स्वास्थ्य सेवा, सामाजिक सचेतना र पर्यटन प्रवद्र्धन जस्ता क्षेत्रमा भएका प्रगतिहरूले वडा नं १ लाई समृद्धिको नमूना क्षेत्रका रूपमा स्थापित गराएको छ।
चन्दननाथ नगरपालिका वडा नं १ ले पछिल्ला वर्षहरूमा विकास र समृद्धिको एक असाधारण यात्रा तय गरेको छ। वडा अध्यक्ष तिलक प्रसाद न्यौपानेले मिति २०७९ साल जेष्ट ६ गते पदवहाली गरेपछि वडावासीको जीवनस्तर उकास्ने, भौतिक पूर्वाधार विकास गर्ने र सामाजिक समानताको सुनिश्चितता गर्न उल्लेखनीय प्रयास गरेका छन्।
तीन वर्षको छोटो अवधिमा वडाले गरेका कार्यहरूले न केवल स्थानीय जनतामा नयाँ आशा जगाएको छ, बरु जुम्ला जिल्लाको विकासमा समेत सकारात्मक प्रभाव पारेको छ। नयाँ सडक, सिचाइ कुलो, शैक्षिक सुविधा, स्वास्थ्य सेवा, सामाजिक सचेतना र पर्यटन प्रवद्र्धन जस्ता क्षेत्रमा भएका प्रगतिहरूले वडा नं १ लाई समृद्धिको नमूना क्षेत्रका रूपमा स्थापित गराएको छ।
वडा अध्यक्ष न्यौपानेको नेतृत्वमा भौतिक पूर्वाधार विकासमा ठूलो फड्को मारेको छ। एरपोर्टदेखि दानसाँधुसम्मको बाटो कालोपत्रे, दानसाँधु चिहान घाट निर्माण, भक्रिबाडा-मुखियाबाडा र कान्जिरोवादेखि दलित बस्तिसम्मका आरसीसी बाटोहरू, तलीचौर ज्यूलो सिचाइ कुलो, राकाफाल्ना भुना बाटो, खाल्टामुखदेखि केवल प्रसादको घरसम्मका बाटोहरूको निर्माण र स्तरोन्नति जस्ता परियोजनाहरू सम्पन्न भएका छन्।
यी परियोजनाहरूले स्थानीय जनताको दैनिक जीवन सहज बनाउनुका साथै व्यापार र यातायातमा समेत सुधार ल्याएको छ। बुकाखोला बाढि नियन्त्रण, सार्कीबाडा पहिरो नियन्त्रण, राष्ट्रिय झण्डा र भगवति मन्दिर जाने सिँडी निर्माण, ठिन्के कुलो नियमितीकरण, माझ कुलो मर्मत, नवप्रभात र मालीका आधारभूत विद्यालयका भवन निर्माण, दानसाँघु किरियाघर र पार्क निर्माण, आँसेमुल पिकनिक स्पोट, साना मन्दिरहरूको निर्माण, आधारभूत स्वास्थ्य केन्द्र भवन र तल्लोधारा खानेपानी जस्ता आयोजनाले वडाको पूर्वाधार विकासमा नयाँ आयाम थपेका छन्।
यी सबै परियोजनाहरूले स्थानीय समुदायको जीवनस्तरमा सुधार ल्याउनुका साथै पर्यटकीय र आर्थिक गतिविधिहरूमा समेत टेवा पुगेको छ।
त्यस्तै सिँचाइ सुविधामा पनि उल्लेखनीय प्रगति भएको छ। तलीचौर सिँचाइ कुलो, ठिन्के देखि फटेकहाल्नासम्मको कुलो निर्माण, डुँडखोच सिचाइ कुलो र अन्य मर्मत कार्यहरूले कृषि उत्पादनमा वृद्धि भएको छ।
विशेष गरी तलीचौरलाई प्याज पकेट क्षेत्र बनाइ प्याज उत्पादनमा ५० प्रतिशत वृद्धि भएको छ, जसले स्थानीय कृषकहरूलाई आर्थिक रूपमा सशक्त बनाएको छ र क्षेत्रको कृषि अर्थव्यवस्थामा नयाँ गति प्रदान गरेको छ। चार वर्षदेखि रोपाइँ हुन नसकेको ठिन्के कुलो नियमित गरि १२ महिना पानी चल्ने बनाइएको छ, जसले किसानहरूको जीवनमा ठूलो राहत प्रदान गरेको छ।
सामाजिक र सांस्कृतिक विकासमा पनि वडा नं १ ले विशेष ध्यान दिएको छ। वडाले महिलाहरूका लागि सचेतना मुलक कार्यक्रम संचालन गर्दै करिब २०० जना महिलालाई सीपमूलक तालिम, स्वास्थ्य जाँच र आर्थिक सशक्तीकरणका कार्यक्रमहरू प्रदान गरेको छ। जनजाति समुदायको उत्थानका लागि विभिन्न कार्याक्रमहरू संचालन गरिएका छन्, जसले उनीहरूको सामाजिक र आर्थिक अवस्थामा सुधार ल्याएको छ।
बालबालिकाहरूको समग्र विकासका लागि खेलकुद, शैक्षिक गतिविधि, लागु औषध नियन्त्रण, बाल विवाह र बालश्रम नियन्त्रण जस्ता कार्यक्रमहरू संचालन गरिएका छन्, जसले युवा पुस्तालाई सकारात्मक दिशातर्फ अघि बढाउन मद्दत गरेको छ।
जेष्ठ नागरिक, एकल महिला र अपाङ्गहरूलाई लक्षित गरी न्यानो कपडा वितरण, स्वास्थ्य शिविर र अन्य सहयोगका कार्यक्रमहरूले समाजको सबै वर्गलाई समेटेको छ। यी प्रयासहरूले वडावासीबीच सामाजिक एकता र सहयोगको भावना बढाएको छ। जनसरोकारका विषयमा सहज सेवा प्रवाहले वडावासीको दैनिकी सहज बनाउनुका साथै प्रशासनिक सुधारमा समेत योगदान पुगेको छ।
शैक्षिक र स्वास्थ्य क्षेत्रमा पनि उल्लेखनीय प्रगति भएको छ। नवप्रभात र मालीका आधारभूत विद्यालयका भवन निर्माण, फिल्ड विकास, पर्खाल निर्माण र शिक्षक सहयोगले शैक्षिक गुणस्तरमा सुधार ल्याएको छ।
आधारभूत स्वास्थ्य केन्द्रको भवन निर्माण र संचालनले स्थानीय जनताको स्वास्थ्य सेवामा सहजता प्रदान गरेको छ। यी प्रयासहरूले वडा नं १ लाई शिक्षा र स्वास्थ्यमा आत्मनिर्भर बनाउने दिशातर्फ अघि बढाएको छ।
पर्यटन र सांस्कृतिक गतिविधिहरूलाई प्रवद्र्धन गर्न पनि वडाले विशेष पहल गरेको छ। आँसेमुल पिकनिक स्पोट, दानसाँघु पार्क, साना मन्दिरहरूको निर्माण र राष्ट्रिय झण्डा तथा भगवति मन्दिर जाने सिँडीले धार्मिक र पर्यटकीय महत्व बढाएको छ।
यी संरचनाहरूले स्थानीय संस्कृति र परम्परालाई संरक्षण गर्नुका साथै बाह्य पर्यटक आकर्षित गर्न सहयोग पुर्याएको छ। हालै सम्पन्न जुम्ला रारा अल्ट्रा म्याराथन जस्ता राष्ट्रिय र अन्तर्राष्ट्रिय कार्यक्रमहरूमा वडा नं १ को सक्रिय सहभागिताले क्षेत्रको पहिचान र विकासमा थप योगदान पुगेको छ।
वडा अध्यक्ष तिलक प्रसाद न्यौपानेले आफ्नो नेतृत्वकालमा भएका उपलब्धिहरूको बारेमा भने, “हामीले वडावासीको गमूद र मंगलका लागि काम गरिरहेका छौं। भौतिक पूर्वाधार विकाससँगै सामाजिक न्याय, समानता र समृद्धिको लक्ष्य हासिल गर्न हामी प्रतिबद्ध छौं। जनताको विश्वास र सहयोगले हामीले यति धेरै गर्न सक्यौं, र यो यात्रा जारी रहनेछ। हाम्रो प्रयासले वडावासीमा नयाँ ऊर्जा थपेको छ, र हामी दिगो विकास, पर्यटन प्रवद्र्धन र युवा सशक्तीकरणमा विशेष जोड दिनेछौं।”
चन्दननाथ नगरपालिका वडा नं १ ले तिलक प्रसाद न्यौपानेको नेतृत्वमा विकास र समृद्धिको नमूना प्रस्तुत गरेको छ। भौतिक र सामाजिक क्षेत्रमा भएका प्रगतिहरूले वडावासीको जीवनस्तर उकास्नुका साथै क्षेत्रको समग्र विकासमा टेवा पुगेको छ। यी प्रयासहरूले वडालाई न केवल स्थानीय रूपमा समृद्ध बनाएको छ, बरु कर्णाली प्रदेश र नेपालको समग्र विकासमा समेत योगदान पुर्याएको छ।
अध्यक्ष न्यौपानेको दृष्टिकोण, मेहनत र समुदायको सहयोगले वडा नं १ लाई एक समृद्ध र सभ्य समाजको रूपमा स्थापित गराएको छ, जसले अन्य क्षेत्रहरूका लागि पनि प्रेरणा बन्न सक्ने देखिन्छ। यो सफलताको कथा वडाबासीको एकता, नेतृत्वको दूरदर्शिता र स्थानीय स्रोतसाधनको प्रभावकारी उपयोगको परिणाम हो। भविष्यमा पनि यस्ता प्रयासहरूले कर्णालीको समग्र विकासमा महत्वपूर्ण भूमिका खेल्ने विश्वास गरिएको छ।
