धितालले थपेका छन् कि चुनावी मैदानमा ‘दासताको साङ्ग्लो’मा बाँधिएका धेरै कार्यकर्ता अहिले भावुक हुँदै सम्पर्कमा आइरहेका छन्। उनीहरूले अब अहंकारको सिंहासन ढलेको भन्दै सहकार्यको हात अघि बढाइरहेको दाबी पनि उनले गरेका छन्।
जुम्लामा सम्पन्न प्रतिनिधिसभा निर्वाचनपछि रौनकता बाँकी नै छ। पराजित उम्मेदवारहरूका सार्वजनिक प्रतिक्रियाले स्थानीय राजनीतिक बहसलाई थप रोचक बनाएको छ।
मत परिणाम सार्वजनिक भएसँगै उम्मेदवारहरूका भनाइ, आरोप–प्रत्यारोप र राजनीतिक सन्देशहरू सामाजिक सञ्जालमा व्यापक रूपमा चर्चित बनेका छन्।
नेपाली कम्युनिस्ट पार्टीबाट उम्मेदवार बनेका नरेश भण्डारीले चुनावी परिणामपछि सार्वजनिक सन्देश जारी गर्दै मतदाताप्रति आभार व्यक्त गरेका छन्। उनले जुम्ला, कर्णाली र समग्र नेपालको समृद्धिको चाहनासहित आफूलाई ११ हजार ६ सय ३५ मत प्रदान गर्ने सम्पूर्ण मतदाताप्रति धन्यवाद व्यक्त गरेका छन्।
भण्डारीले निर्वाचनका क्रममा आफूलाई सहयोग गर्ने कार्यकर्ता, समर्थक तथा शुभचिन्तकप्रति पनि विशेष कृतज्ञता प्रकट गरेका छन्। उनले चुनावी अभियानमा प्रत्यक्ष वा अप्रत्यक्ष रूपमा साथ दिने सबैलाई धन्यवाद दिँदै मतदान गर्न चाहेर पनि विभिन्न कारणले मतदान गर्न नसकेका मतदाताप्रति पनि आफू उत्तरदायी रहने बताएका छन्।
उनले लोकतान्त्रिक प्रणालीमा हार–जित स्वाभाविक प्रक्रिया भएको उल्लेख गर्दै जनताको निर्णयलाई सम्मानपूर्वक स्वीकार गर्ने बताएका छन्। साथै मातृभूमि र जनताको सेवामा निरन्तर समर्पित रहने प्रतिबद्धता पनि व्यक्त गरेका छन्। सन्देशको अन्त्यमा उनले छोटो तर अर्थपूर्ण वाक्य लेखेका छन्, ‘तारा भीएस सारा।’
यसैबीच, जुम्लामा प्रगतिशील लोकतान्त्रिक पार्टीबाट उम्मेदवार बनेका मनऋषि धितालले पनि सामाजिक सञ्जालमार्फत आफ्नो धारणा सार्वजनिक गरेका छन्। उनी जनयुद्धको समयमा नरेश भण्डारीका सहकर्मी समेत हुन।
धितालको भनाइ प्रत्यक्ष रूपमा नाम नलिए पनि चुनावी बहसको केन्द्रमा रहेको देखिन्छ। उनले लेखेका छन्, ‘एक जना निर्दलीय सोचाइ राख्ने मेरा सहयात्री उम्मेदवारले भनेछन्, चुनावमा नौ जना मेरो विरुद्ध लड्न आए।’
धितालले त्यसलाई लक्षित गर्दै प्रश्न उठाएका छन्, ‘हाम्रो राजनीति भित्रै हामीले बलिदान दिएर हुर्काएका यी मित्रको मथिंगल कसरी निर्दलीय बन्यो होला?’
उनले पार्टी संगठन र कार्यकर्ताको भूमिकालाई स्मरण गर्दै चुनावी समयमा कार्यकर्तालाई ‘आस्थाको कसिलो बन्धन होइन, दासताको साङ्ग्ला’ले बाँधिएको टिप्पणी पनि गरेका छन्।
धितालका अनुसार यही कारणले स्वाभाविक रूपमा हुन सक्ने मत परिवर्तन हुन नपाएको र मत परिणाम अपेक्षाभन्दा कम आएको हुन सक्ने संकेत गरेका छन्।
उनले आफ्नो पोस्टमा थपेका छन् कि चुनावी मैदानमा ‘दासताको साङ्ग्लो’मा बाँधिएका धेरै कार्यकर्ता अहिले भावुक हुँदै सम्पर्कमा आइरहेका छन्। उनीहरूले अब अहंकारको सिंहासन ढलेको भन्दै सहकार्यको हात अघि बढाइरहेको दाबी पनि उनले गरेका छन्।
धितालले विभिन्न ‘दरबार’का प्रभावबाट मुक्त भएर आउने सबैलाई आफ्नो राजनीतिक अभियानमा स्वागत गर्ने बताएका छन्। उनले प्रगतिशील लोकतान्त्रिक राजनीतिक संस्कृतिमा विविध विचार, रंग र सुगन्धलाई स्थान दिने सन्देश पनि दिएका छन्।
उनको पोस्टको अन्त्यमा एउटा प्रतीकात्मक सन्देश पनि छ, ‘आउनुस्, २२२ खुलेका ‘आँखा’मा तपाईंका जोडी ‘आँखा’ थपौं। संसार अझ सुन्दर र फराकिलो देखिन्छ।’
फागुन २१ गते सम्पन्न प्रतिनिधिसभा निर्वाचनमा राप्रपा उम्मेदवार ज्ञानेन्द्र शाहीले १४ हजार ८१६ मत प्राप्त गर्दै विजयी भएका थिए। उनका निकटतम प्रतिद्वन्द्वी नरेश भण्डारीले ११ हजार ६३६ मत प्राप्त गरेका थिए। उनीहरूबीचको मतान्तर ३ हजार १८१ रहेको छ।
अन्य उम्मेदवारहरूतर्फ रास्वपा उम्मेदवार विनिता कठायतले ४२१ मत, नेमकिपाका विर्ष बहादुर रावतले ४०० मत, प्रलोपा उम्मेदवार मनऋषि धितालले ११२ मत, नेजपा उम्मेदवार रनील विक्रम शाहीले ४३ मत, नेकपा (माओवादी)का बिर्ख बहादुर शाहीले ७१ मत तथा स्वतन्त्र उम्मेदवार भक्त बहादुर रावलले १४ मत प्राप्त गरेका छन्।
यी सबै मत जोड्दा पनि भण्डारी र शाहीबीचको मतान्तरसँग पूर्ण रूपमा मेल नखाने देखिन्छ, जसले चुनावी गणितबारे स्थानीय स्तरमा थप बहस सिर्जना गरेको छ।
निर्वाचन सकिएसँगै जुम्लाको राजनीति फेरि नयाँ बहसतर्फ मोडिएको छ। उम्मेदवारहरूका प्रतिक्रिया र राजनीतिक सन्देशहरूले आगामी दिनमा स्थानीय राजनीतिक ध्रुवीकरण, सहकार्य वा नयाँ समीकरण कता जान्छ भन्ने प्रश्नलाई अझ चासोको विषय बनाइदिएको छ।
