आज बिहान ८ बजे जुम्ला जिल्ला हिमा गाउँपालिका–७ बागबजारमा नाग्मा–गमगडी (मुगु जाने) सडक खण्डमा ठूलो पहिरो खसेर यातायात आवागमन पूर्ण रूपमा अवरुद्ध भएको छ।
सडक डिभिजन कार्यालयका अनुसार सडकको माथिल्लो भागबाट आएको पहिरोले सम्पूर्ण बाटो पुरिएका कारण सवारी सञ्चालन असम्भव भएको हो। घटनास्थलमा सडक डिभिजनको प्राविधिक टोली परिचालन गरिएको छ।
हाल पहिरो पन्छाउने कार्यका लागि आवश्यक उपकरण र जनशक्ति परिचालन गर्ने तयारी भइरहेको डिभिजन कार्यालय प्रमुख दीपेन्द्र कुमार चौधरी बताए। सडक कहिले सुचारु हुन्छ भन्ने यकिन समय भने तोकिएको छैन।
