पातारासी गाउँपालिकामा करार शिक्षकहरूले गरेको तालाबन्दी खुलेको छ। पालिकाको एकपक्षीय निर्णयविरुद्ध आन्दोलनमा उत्रिएका अनुदान शिक्षकहरू र स्थानीय नेतृत्वबीच समुदाय स्तरमा छलफल गर्ने सहमति भएपछि तालाबन्दी खुलाइएको हो।
यसअघि गाउँपालिकाभित्रका १५ वटा सामुदायिक विद्यालयमा कार्यरत ५२ जना अनुदान शिक्षकलाई ‘अर्को व्यवस्था वा आदेश नआएसम्म’ विद्यालयमा उपस्थित नहुन सूचित गरिएको थियो। पालिकाको सो निर्णयले उत्पन्न अन्यौलता र असुरक्षाको वातावरणविरुद्ध पातारासी गाउँपालिका शिक्षण अनुदान शिक्षक संघर्ष समितिका अध्यक्ष जयसिंह सार्कीको नेतृत्वमा आन्दोलन सुरु भएको थियो।
संघर्ष समितिका अध्यक्ष सार्कीले भने, “गाउँपालिकाको निर्णय शिक्षकमाथि अन्यायपूर्ण थियो। शिक्षण संस्थामा काम गरिरहेका शिक्षकहरूको अधिकार खोस्ने निर्णय कतैबाट पनि न्यायोचित होइन।”
तर पछिल्लो समय वडा अध्यक्षहरूको रोहबरमा संघर्ष समिति र पालिकाबीच प्रारम्भिक संवाद सुरु भएको हो। छलफलमा समुदायको प्रतिनिधित्व हुने गरी निष्पक्ष निर्णय निकाल्ने तयारी गरिएको छ। त्यसैका आधारमा आन्दोलनकारी पक्षले तालाबन्दी हटाएका हुन्।
शिक्षकहरूले स्थायीत्व, पारदर्शिता र न्यायोचित व्यवस्थापनको माग राख्दै आएका छन्। “हामी शिक्षा क्षेत्रलाई बाधित गर्ने पक्षमा होइनौं,” सार्कीले भने, “तर अधिकार खोसिँदा चुप लाग्न सक्दैनौं। अब समुदायको सहभागितामा सहमति खोजिनेछ भन्ने विश्वास गरेका छौं।”
