बिहीबार, ३ मंसिर, २०८३

बंगलादेशी सहकारी टोलीद्वारा चन्दननाथ अर्गानिक मिनी मार्केट अवलोकन

नेपालको सहकारी अभियानको अध्ययन तथा अवलोकन भ्रमणमा रहेको बंगलादेशको ‘द को–अपरेटिभ क्रेडिट युनियन लिग अफ बंगलादेश लिमिटेड’ (सीसीयूएलबी) को २० सदस्यीय प्रतिनिधिमण्डलले बुधबार भद्रकालीस्थित अर्गानिक मिनी मार्केटको अवलोकन गरेको छ ।

जुम्लाको चन्दननाथ बहुउद्देश्यीय सहकारी संस्थाले सञ्चालनमा ल्याएको उक्त मिनी मार्केटमा पुगेको टोलीलाई संस्थाका प्रमुख व्यवस्थापक ऋषिराज पाण्डेले स्वागत गर्दै संस्थाका गतिविधिबारे जानकारी गराए ।

पाण्डेले जुम्लाका किसान सदस्यले उत्पादन गरेका रैथाने तथा अर्गानिक कृषि उपजको सङ्कलन, बजारीकरण र बिक्री गर्दै आएको बताए । स्थानीय उत्पादनलाई बजारसँग जोडेर सदस्यको आयआर्जन वृद्धि गर्न संस्थाले काम गरिरहेको उनको भनाइ थियो ।

अवलोकनका क्रममा प्रतिनिधिमण्डलले मिनी मार्केटमा राखिएका मार्सी चामल, स्याउ, च्याउको चाना, सिमी दाल, टिमुर, अर्गानिक चियालगायत रैथाने उत्पादन खरिद गरेको छ ।

नेपाल बचत तथा ऋण केन्द्रीय सहकारी सङ्घ (नेफ्स्कून) का अध्यक्ष चन्द्रप्रसाद ढकालसमेत सहभागी अवलोकनका क्रममा विदेशी प्रतिनिधिहरूले नेपाली सहकारीमार्फत उत्पादित स्थानीय वस्तुप्रति चासो देखाएका थिए ।

बंगलादेशको सहकारी मन्त्रालयका उच्च अधिकारी, सहकारी विभागका रजिस्ट्रार, सीसीयूएलबीका सञ्चालक तथा प्रमुख कार्यकारी अधिकृतसहितको टोलीले नेपालका ९ वटा बचत तथा ऋण सहकारी संस्था, नेफ्स्कून र सहकारी रजिस्ट्रारको कार्यालयको अवलोकन तथा अन्तरक्रिया गर्ने कार्यतालिका छ ।

नेफ्स्कून र सीसीयूएलबीबीच सन् २००५ देखि पारस्परिक अध्ययन भ्रमणमार्फत सहकारी क्षेत्रको ज्ञान, सीप र असल अभ्यास आदानप्रदान हुँदै आएको छ ।

प्रकाशित :

प्रतिक्रिया दिनुहोस्

प्रकाशित :

प्रतिक्रिया दिनुहोस्

सम्बन्धित समाचार

सम्बन्धित समाचार

सम्बन्धित समाचार

ताजा समाचार