अत्यधिक रक्तस्राव हुन थालेपछि थप उपचारका लागि प्रसूति केन्द्रले जिल्ला अस्पताल लैजान सल्लाह दिएपछि परिवारले राति १० बजे जिल्ला अस्पतालमा पुर्याएका थिए।
बुधबार बिहान ११ बजे घरमै सुत्केरी भएकी सोरु गाउँपालिका–८ रुमा गाउँकी ३४ वर्षीया सुनिता बुढाको उपचारको क्रममा जिल्ला अस्पतालमा मृत्यु भएको छ।
बुधबार बिहान ११ बजे घरमै सुत्केरी भएकी सोरु गाउँपालिका–८ रुमा गाउँकी ३४ वर्षीया सुनिता बुढाले छोरा जन्माएकी थिइन्। घरमै सुत्केरी भएकी बुढाको सालनाल नझरेपछि उनलाई उपचारका लागि घरबाट एक घण्टा टाढा रहेको सिप प्रसूति केन्द्रमा परिवारले पुराएका थिए।
अत्यधिक रक्तस्राव हुन थालेपछि थप उपचारका लागि प्रसूति केन्द्रले जिल्ला अस्पताल लैजान सल्लाह दिएपछि परिवारले राति १० बजे जिल्ला अस्पतालमा पुर्याएका थिए। तर उनको उपचारको क्रममा बिहीबार बिहान ३ बजे मृत्यु भएको हो।
राति १० बजे अस्पतालमा पुगेकी बुढालाई चिकित्सकहरूले परीक्षण गर्दा अत्यधिक रक्तस्रावका कारण उनको शरीरमा जम्मा दुई प्वाइन्ट रगत मात्र रहेको देखिएको उपचारमा संलग्न डाक्टर नहकुल शाहीले जानकारी दिए।
बुढालाई तत्काल आवश्यक रगत चढाउनु पर्ने अवस्था थियो। तर जिल्ला अस्पतालमा ब्लड बैंक नभएकाले चिकित्सकहरूले आफ्नै फेसबुकमार्फत रक्तदानको लागि सूचना प्रवाह गरेपछि सदरमुकाम गमगढीका युवाहरूले पाँच प्वाइन्ट रगत दान गरेका थिए।
एक वर्षअघि पनि मृतक बुढा घरमै गर्भपतन भई अत्यधिक रक्तस्राव भएपछि जिल्ला अस्पतालमा उपचारका लागि आएकी थिइन्। त्यतिबेला पनि चिकित्सकहरूले उनको शरीरमा आवश्यक रगत चढाई उपचार गरेका थिए।
उपचारपछि घर फर्किँदा जिल्ला अस्पतालका चिकित्सकहरूले कुनै पनि औषधि चिकित्सकको सल्लाह बिना नखानु, गर्भ रहँदा प्रसूति केन्द्रमा गएर नियमित चेकजाँच गराउनु र स्वास्थ्य संस्थामै गएर सुत्केरी हुनु भन्ने सल्लाह दिएका थिए।
सोरु गाउँपालिकामा सबै ठाउँमा प्रसूति केन्द्र भए पनि त्यहाँका महिलाहरू घरमै सुत्केरी हुने गरेको र अन्तिममा समस्या देखिएपछि मात्र स्वास्थ्य संस्थामा आउने गरेको धेरै घटना रहेको जिल्ला अस्पतालका चिकित्सक डाक्टर नहकुल शाहीले बताए।
उपचारमा संलग्न चिकित्सकहरूको अनुसार, अस्पतालमा पुग्दा सम्म सालनाल नझरेर अत्यधिक रक्तस्रावका कारण मृतक बुढा बेहोस भएकी थिइन्। आवश्यक रगतको व्यवस्था गरेर शरीरमा रगत चढाएपछि बिहीबार बिहान होसमा आएकी थिइन्।
थप उपचारका लागि सुविधा सम्पन्न अस्पताल लैजान प्रमुख जिल्ला अधिकारी खडानन्द खत्रीले गृह मन्त्रालयसँग समन्वय गरेर हेलिकोप्टरको व्यवस्थापन गरिरहेकै बेला उनको ज्यान गएको जिल्ला अस्पतालका प्रमुख डाक्टर निर्मल नगरकोटीले बताए।
डाक्टर नगरकोटीका अनुसार बुधबार बिहान ११ बजे सुत्केरी भई सालनाल नझरेपछि उपचारका लागि परिवारले राति १० बजे मात्रै अस्पताल ल्याएका थिए।
बुढाको उपचारको क्रममा मृत्यु भए पनि उनीबाट जन्मेको छोरा भने सामान्य अवस्थामा रहेको र हाल चिकित्सकहरूको निगरानीमा जिल्ला अस्पतालमै राखिएको डाक्टर नगरकोटीले जानकारी दिए।
(यो समाचार मुगुका पत्रकार जीवन सेजुवालको सहयोगमा तयार पारिएको हो।)
