बीमा बेच्नु एक व्यवसाय मात्र होइन। यो कसैको भविष्य सुरक्षित गर्ने जिम्मेवारी पनि हो। अझ कर्णालीका विकट गाउँबस्तीमा पुगेर जीवन बीमाको महत्व बुझाउनु र नागरिकलाई जोखिमविरुद्ध सुरक्षित बनाउनु आफैंमा चुनौतीपूर्ण काम हो। यही चुनौतीलाई अवसरमा बदल्दै निरन्तर यात्रामा छन्, जुम्लाका गौरव बहादुर शाही।
नेपालगञ्ज शाखामा आबद्ध भएर सूर्यज्योति लाइफ इन्स्योरेन्सको बीमा व्यवसायमा सक्रिय शाहीले कर्णालीका विकट बस्तीमा पुगेर सयौं नागरिकलाई जीवन बीमाको दायरामा ल्याएका छन्।
हुम्ला, जुम्लासहित कर्णालीका विकट भूगोलमा पुगेर उनले बीमालाई केवल व्यापारका रूपमा होइन, नागरिकको जीवन र भविष्यसँग जोडिएको सुरक्षाको आधारका रूपमा स्थापित गर्ने प्रयास गर्दै आएका छन्।
त्यही निरन्तर मेहनत, विश्वास र समर्पणको परिणाम हो, गत आर्थिक वर्ष २०८१/०८२ मा सूर्यज्योति लाइफ इन्स्योरेन्सका देशभरका हजारौं अभिकर्तामध्ये गौरव बहादुर शाहीले हासिल गरेको दोस्रो स्थान।
उनले आफ्नो व्यक्तिगत कोडबाट दुई करोड ९९ लाख ६७ हजार रुपैयाँ बराबरको बीमा व्यवसाय गर्न सफल भए। यो सफलता केवल कारोबारको ठूलो अंकमा सीमित छैन। यसभित्र कर्णालीका गाउँगाउँमा पुगेका उनका पाइला, नागरिकसँग जोडिएका सम्बन्ध, बुझाइएको बीमाको महत्व र विश्वास जित्न गरिएको अथक मेहनतको कथा लुकेको छ।
शाहीले एक वर्षको अवधिमा ११७ वटा बीमा पोलिसी बिक्री गरेका छन्। उनका लागि ती ११७ वटा पोलिसी केवल कागजका सम्झौता होइनन्। ती प्रत्येक पोलिसी कुनै परिवारको भविष्यप्रतिको भरोसा हुन्, कुनै अभिभावकको आफ्ना सन्तानप्रतिको चिन्ता हुन् र कुनै परिवारलाई भोलिको अनिश्चितताबाट जोगाउने एउटा प्रयास हुन्।
हिमाली र पहाडी जिल्लाका धेरै बस्ती अझै पनि सडक, सञ्चार र अन्य आधारभूत सेवाको सहज पहुँचबाट टाढा छन्। कतिपय ठाउँमा पुग्न घण्टौं पैदल हिँड्नुपर्ने अवस्था छ। यस्तो भूगोलमा बीमाको पहुँच विस्तार गर्नु अझ कठिन काम हो। तर, यही कठिन बाटोलाई शाहीले आफ्नो कर्मक्षेत्र बनाएका छन्।
जुम्ला र हुम्लाका गाउँबस्तीमा पुग्दा उनले नागरिकका फरक–फरक जीवन कथा सुनेका छन्। कसैको आम्दानी सीमित छ, कसैको परिवारमा रोजगारीका लागि विदेश वा देशका अन्य शहर पुगेका सदस्य छन्। कसैलाई भविष्यमा आउने स्वास्थ्य तथा आर्थिक जोखिमको चिन्ता छ। यिनै नागरिकका समस्या र आवश्यकतालाई बुझेर उनले जीवन बीमालाई उनीहरूको जीवनसँग जोड्ने प्रयास गरेका छन्।
बीमाको बजारमा प्रतिस्पर्धा धेरै छ। तर, शाहीको यात्राको विशेषता भनेको विकट भूगोलमा पुगेर नागरिकको विश्वास जित्नु हो। बीमा अभिकर्ताका रूपमा उनको सफलता केवल बिक्री संख्या वा कारोबारको रकमले मात्र मापन हुँदैन। उनले कर्णालीका सयौं परिवारलाई ‘जोखिम पर्दा परिवारको आर्थिक अवस्था नढलोस्’ भन्ने सोचसँग जोड्ने काम पनि गरेका छन्।
उनको सफलताले कर्णालीमा सम्भावना छैन भन्ने सोचलाई पनि चुनौती दिएको छ। अवसरको खोजीमा शहरतिर मात्रै दौडिनुपर्छ भन्ने मान्यताभन्दा फरक, आफ्नै भूगोल र समुदायसँग जोडिएर पनि व्यावसायिक सफलता हासिल गर्न सकिन्छ भन्ने उदाहरण शाहीले प्रस्तुत गरेका छन्।
सूर्यज्योति लाइफ इन्स्योरेन्सका अभिकर्तामध्ये दोस्रो स्थान हासिल गर्नु उनका लागि व्यक्तिगत उपलब्धि मात्रै होइन, जुम्ला र समग्र कर्णालीका लागि पनि गर्वको विषय बनेको छ। अझ महत्वपूर्ण कुरा, उनको सफलता त्यही भूगोलबाट आएको छ, जहाँ बीमाको पहुँच विस्तार गर्न सबैभन्दा बढी चुनौती छ।
गौरवको यो यात्राले एउटा सन्देश दिन्छ, सफलता सधैं सहज बाटो रोजेर प्राप्त हुँदैन। कहिलेकाहीँ कठिन भूगोल, सीमित स्रोत र अनेकौं चुनौतीबीच निरन्तर हिँडिरहने साहसले नै सफलताको शिखरमा पुर्याउँछ।
