नवग्रहको पूजा गर्नाले ग्रह दोष कटानी भइ ग्रहले निम्त्याउने नकारात्मक प्रभाव कम हुन्छ भन्ने जनविश्वास छ।
गण्डकी प्रदेशको एक पर्यटकीय गन्तव्य मानिने स्याङ्जाको अर्जुनचौपारी गाउँपालिका धार्मिक दृष्टिकोणले पनि उत्तिकै महत्त्वपूर्ण मानिन्छ।
डहरे देउराली, रापाकोट कालिका, एकानन्द गुफा जस्ता पवित्र धार्मिक स्थल भएको अर्जुनचौपारीमा अहिले नेपालकै पहिलो नवग्रह मन्दिरको निर्माण कार्य थालनी भएसँगै धर्मावलम्बीहरूको घुइँचो लाग्न थालिसकेको छ।
हिन्दु धर्ममा ग्रहको अति महत्व छ। ज्योतिष शास्त्रका अनुसार मानव जीवनमा आइपर्ने हरेक घटनाक्रमका रेगुलेटर नवग्रहलाई मानिन्छ।
नवग्रहमा सूर्य, चन्द्र, मङ्गल, बुध, बृहस्पति, शुक्र र शनि गरि सात आकाशीय पिण्ड तथा राहु र केतु ग्रह पर्दछन्। यिनकै स्थान र स्थितिले हाम्रो जीवनका हरेक घटना परिचालन गर्ने ज्योतिषहरूको मान्यता छ।
केहि अप्रिय घटना हुने बित्तिकै ग्रह लागेको भनि ग्रहशान्ति पूजा लगाउने चलन हिन्दू धर्ममा व्यापक छ। नवग्रहको पूजा गर्नाले ग्रह दोष कटानी भइ ग्रहले निम्त्याउने नकारात्मक प्रभाव कम हुन्छ भन्ने जनविश्वास छ।
यद्यपी ग्रह पूजाका लागि मन्दिर भने नेपालमा अहिलेसम्म निर्माण भएको थिएन। स्याङ्जा अर्जुनचौपारीको केटिचौर भन्ने ठाउँमा निर्माणाधीन नवग्रह मन्दिर नेपालकै पहिलो नवग्रह मन्दिर हो।
यहि फागुन ६ देखि १४ गतेसम्म उक्त मन्दिरमा अनुष्ठान कार्य तथा धार्मिक महोत्सव चलिरहेको छ। १४४ वर्षमा आउने महाकुम्भ योगको अवसरमा अनुष्ठान कार्यक्रम राखिएको हो।
