जुम्लामा लामो समयपछि यस वर्षको पहिलो हिमपात भएको छ। शुक्रबार रातिदेखि सुरु भएको हिमपातले लामो समयदेखि खडेरीको मार खेप्दै आएका यहाँका किसानहरूमा खुसी छाएको छ।
तिला गाउँपालिका ३ का स्थानीय किसान रामबहादुर तिरुवाका अनुसार अहिले खेतबारीमा लगाएको जौं र गहुँ बालीले सिँचाइ पानी नपाउदा सुक्का भएको थियो। यस्तो समयमा हिमपात हुँदा खेतीपातीका लागि निकै ठूलो राहत पुग्ने र हिउँले जमिनमा पर्याप्त चिस्यान कायम गराउने भएकोले अब लगाएको बाली राम्रोसँग सप्रिने आशा पलाएको छ ।
अर्का जुम्लाका स्थानीय किसान नन्दराम सार्कीले हिउँ नपर्दा खेतीपाती सखाप हुने अवस्था आएकोमा चिन्ता व्यक्त गर्दै अहिले हिउँ परेपछि आफू निकै हर्षित भएको बताएका छन् ।
‘अब लगाएको बालीले केही न केही उब्जनी दिनेमा हामी ढुक्क छौंं’ , उनले भने।
माघ महिनामा भएको यो वर्षा र हिमपातले हिउँदे बाली निकै राम्रो हुनेमा यहाँका कृषकहरू विश्वस्त देखिएका छन्।
