कनकासुन्दरी गाउँपालिका-१ स्थित न्याउरीघाटमा लगातारको वर्षापछि खसेको ठूलो पहिरोले उर्थु–भुलभुले भित्री सडक पूर्णरूपमा अवरुद्ध भएको छ। मिति २०८२ साउन ६ गते राति परेको अबिरल वर्षाका कारण करिब दुई किलोमिटर सडक क्षेत्रमा माथिबाट माटो, ढुंगा र रुखसहितको पहिरो खस्दा सडक सम्पर्क ठप्प भएको हो।
सडक बन्द भएको जानकारी २०८२ साउन ७ गते दिउँसो १ बजे जिल्ला प्रहरी कार्यालय जुम्लामा प्राप्त भएको थियो। त्यसपछि चौथा प्रहरी चौकीबाट प्रहरी हवल्दार रमेश गिरीको नेतृत्वमा तीन जनाको प्रहरी टोली घटनास्थलतर्फ खटिएको जिल्ला प्रहरी कार्यालयले जनाएको छ। चौथाबाट करिब ८ किलोमिटर पूर्व–उत्तरतर्फ रहेको उक्त स्थानमा पहिरोको मात्रा ठूलो भएकाले बाटो खुलाउन केही दिन लाग्ने प्रारम्भिक अनुमान गरिएको छ।
हालसम्म कुनै मानवीय क्षति नभएको बताइए पनि सडक अवरुद्ध हुँदा स्थानीयवासी र यात्रुहरूलाई दैनिक आवतजावतमा ठूलो समस्या भएको छ। बाटो खुलाउने प्रयास भइरहेको र थप मेसिन तथा जनशक्ति परिचालन गर्न सम्बन्धित निकायसँग समन्वय भइरहेको प्रहरीले जनाएको छ।
प्रहरीले पहिरो अझै खस्ने जोखिम कायमै रहेको भन्दै स्थानीयवासीलाई सतर्क रहन आग्रह गरेको छ।
