भारतको कर्नाटकस्थित बेङ्लोरबाट जुम्ला रारा अल्ट्रा म्याराथनमा सहभागी हुन आएकी खेलाडी सिन्धु रावले जुम्लाका सार्वजनिक स्थलमा लेखिएका अश्लील र अमर्यादित शब्द मेटाउने अभियान थालेकी छन्।
उनले रंगशाला, धर्मशाला तथा विभिन्न सार्वजनिक पर्खालहरूमा लेखिएका अभद्र शब्द आफ्नै खर्चमा रङ किनेर मेटाइरहेकी छन्।
स्थानीय निकाय र सरोकारवाला मौन रहेका बेला विदेशी भूमिबाट आएकी एक खेलाडीले जुम्लाको सौन्दर्य र सामाजिक मर्यादा जोगाउन सक्रियता देखाएकी हुन्।
सिन्धु रावले सार्वजनिक स्थललाई कुरूप बनाउने प्रवृत्ति सभ्य समाजको परिचय नभएको बताउँदै यस्ता गतिविधिले नयाँ पुस्तामा गलत सन्देश जाने उल्लेख गरेकी छन्।
