उच्च अदालत सुर्खेत अन्तर्गत रहेको जुम्ला इजलासले आर्थिक वर्ष २०८१/८२ मा दर्ता भएका कुल २१७ मुद्दामध्ये २०२ वटा अर्थात् ९३.०८ प्रतिशत मुद्दा फर्छ्यौट गरेको छ।
जुम्ला इजलासले मंगलबार आयोजना गरेको पत्रकार भेटघाट कार्यक्रममा प्रस्तुत प्रगति विवरणअनुसार, सो अवधिमा १९१ नयाँ मुद्दा दर्ता भएका थिए भने २६ वटा मुद्दा अन्यत्रबाट सरुवा भएर आएका थिए।
निर्धारित वार्षिक फर्छ्यौट लक्ष्य १७८ मात्र भए पनि इजलासले त्यसभन्दा बढी मुद्दा टुंग्याउन सफल भएको छ। हाल १५ वटा मुद्दा मात्र बाँकी रहेका छन्।
तीन वर्षको तुलनात्मक विवरण हेर्दा २०७९/८० मा २५५ मुद्दामध्ये २०५ फर्छ्यौट भएका थिए भने २०८०/८१ मा २७९ मध्ये २५३ वटा मुद्दा टुंग्याइएको थियो।
थुनुवा मुद्दामध्ये गत वर्ष ४३ दर्ता भएका मध्ये ४० फर्छ्यौट भएका छन्। दर्ता मुद्दाहरूमा जबर्जस्ती करणी (६२), ज्यान मार्ने उद्योग (१४), लागू औषध (१४), कर्तव्य ज्यान (१०), नकबजनी (१०), चोरी (९) लगायतका थिए।
मुख्य न्यायाधीश श्यामजी प्रधानका अनुसार भर्चुअल सुनुवाइ र छिटो न्याय सुनिश्चित गर्न सबै संयन्त्र परिचालित छन्।
पाँच जिल्ला अदालतको विवरणमा भने अझै सयौं मुद्दा बाँकी रहेको छ, जसले सुधार सम्भावनासँगै चुनौती पनि औंल्याउँछ।
