तिमी साथमै भइदिए खुसी हुँदै
कुशे औंसीको शुभकामना दिन्थेँ,
घण्टौंसम्म तिम्रो चेहरामा आफ्ना
एक जोर आँखा गाडेर हेरिरहन्थेँ,
तिमीलाई तिम्रो दीर्घायुको कामना
व्यक्त गर्थें
मेरो आयु पनि मेरा बालाई थपिदिनु
भनेर भगवानसँग प्रार्थना गर्थेँ,
तिमीबाट थुप्रै आशीर्वाद लिन्थेँ,
मेरा बा सदा खुसी रहुन् भनी
कामना गर्थें,
आफ्नै हातले आज तिम्रो निधारमा
रातो अबिरको टिका लाइदिन्थेँ,
तिमीलाई विभिन्न परिकारका
मिठाई खुवाएर तिम्रा दुखद
परिस्थितिलाई सहज बनाउने प्रयास गर्थें,
आज मेरो आफ्नै कमाइको पैसाले किनिदिएका
नयाँ लुगा तिमीलाई उपहार दिन्थेँ,
चप्पल नपाएर फुटेका तिम्रा पैताला लाई आज
जुत्ता मोजा किनिदिन्थेँ,
दिनरात नभनी काम गर्ने मेरा बालाई आज
एकदिन आनन्दले बसेर आरामको
सास फेर है बा,भन्थेँ,
तिम्रो छातीमा टाँसिएर मुसुक्क हाँसेर
खिचेको तस्वीर फेसबुकमा अपलोड गर्थें!
तर म अभागीको भागमा यो सबै कहाँ
लेखिएको रहेछ र !
मेरो भाग्यमा त अभाव लेखिएको छ,
खुसीहरूलाई केरकार पारिएका छन्,
तिमीलाई सम्झेर तड्पिनु बाहेक अरु
केही लेखिएको छैन।
तिमी साथमा नभए पनि एउटा तस्वीर
हेरेर मात्र भएपनि मन बुझाउने हुन्थ्यो
यदि तिम्रो तस्वीर भइदिए
छैन त्यसैले त याद आएको बेला अँगालेर
रून पाउँदिन न तिमीलाई न तिम्रो तस्वीरलाई
बा!
बस्, म तिमीलाई सम्झिरहन्छु, तड्पिरहन्छु,
कहिलेकाँहि लाग्छ तिमी भएकै ठाउँमा गईदिउँ,
म पनि तिम्रो संसारको अंश बनिदिउँ!
तिमी जहाँ भएपनि सदा खुसी रहनु है बा
मलाई अदृश्य रूपमै भएपनि
आशीर्वाद दिईराख्नु है बा!
