मुगुको रारा तालको काखमा कर्णाली अन्तर्राष्ट्रिय चलचित्र महोत्सवले कर्णालीको प्राकृतिक सौन्दर्य र सांस्कृतिक विविधतालाई विश्वमाझ चिनाउने अभियान बोकेको छ। चलचित्र विकास बोर्डको सहकार्यमा आयोजित यो महोत्सवमा बोर्डका अध्यक्ष दिनेश डीसी, निर्देशक दीपाश्री निरौला र अभिनेता प्रदीप खड्का सहभागी छन्।
चलचित्र विकास बोर्डले नेपालको सांस्कृतिक र प्राकृतिक वैभवलाई विश्वसामु उजागर गर्न एकैसाथ चार फरक स्थानमा जीवन्त कार्यक्रमहरू सञ्चालन गरिरहेको छ। दीर्घकालीन नीति, पूर्वाधार विकास र प्रणालीगत सुधारका कदमहरूसँगै बोर्डले देशका विविध भौगोलिक र सांस्कृतिक क्षेत्रमा चलचित्रसँग जोडिएका रचनात्मक पहलहरू अघि बढाएको छ। यी कार्यक्रमहरूले नेपालको सांस्कृतिक सम्पदा संरक्षणदेखि क्षेत्रीय प्रतिभालाई प्रोत्साहन र पर्यटन प्रवर्धनसम्मका लक्ष्य बोकेका छन्।
काठमाडौँमा ‘महिला फिल्म बनाउँछन्’ कार्यशाला सञ्चालनमा छ, जसले महिला चलचित्रकर्मी, निर्देशक र प्राविधिकहरूलाई फिल्म निर्माणको व्यावहारिक ज्ञान र सीप प्रदान गरी उनीहरूको क्षमता अभिवृद्धि गर्न केन्द्रित छ। शान्ता नेपाली प्रोडक्सनद्वारा आयोजित यो दुईहप्ते कार्यशालाले महिलाहरूलाई चलचित्र क्षेत्रमा सशक्त बनाउने सपना बोकेको छ।
पोखरामा ‘लाइट क्यामेरा एक्सन’ कार्यक्रमले नयाँ पुस्तालाई चलचित्र निर्माणको प्राविधिक र रचनात्मक पक्षसँग जोडिरहेको छ। गुरुङ चलचित्रकर्मी सङ्घको आयोजनामा वैशाख २५ सम्म सञ्चालन हुने यो कार्यशालाले क्षेत्रीय प्रतिभाहरूलाई राष्ट्रिय मञ्चमा ल्याउने प्रयास गरिरहेको छ, जसले कास्कीका युवा चलचित्रकर्मीहरूमा नयाँ उत्साह जगाएको छ।
मुगुको रारा तालको काखमा कर्णाली अन्तर्राष्ट्रिय चलचित्र महोत्सवले कर्णालीको प्राकृतिक सौन्दर्य र सांस्कृतिक विविधतालाई विश्वमाझ चिनाउने अभियान बोकेको छ। चलचित्र विकास बोर्डको सहकार्यमा आयोजित यो महोत्सवमा बोर्डका अध्यक्ष दिनेश डीसी, निर्देशक दीपाश्री निरौला र अभिनेता प्रदीप खड्का सहभागी छन्। रारालाई चलचित्र छायाङ्कनको आकर्षक गन्तव्य बनाउने यो महोत्सवले कर्णालीको पर्यटन प्रवर्धनमा ठूलो योगदान पुर्याउने अपेक्षा गरिएको छ।
दोलखामा थामी समुदायको विवाह परम्परालाई जीवन्त राख्न वृत्तचित्र छायाङ्कन भइरहेको छ। थामी चलचित्र सङ्घको पहलमा बोर्डको सहयोगमा सञ्चालित यो परियोजनाले लोपोन्मुख सांस्कृतिक सम्पदाको संरक्षण र दस्तावेजीकरणमा महत्त्वपूर्ण भूमिका खेलिरहेको छ। यो प्रयासले नेपालको सांस्कृतिक विविधतालाई भावी पुस्तासम्म जीवित राख्ने लक्ष्य राखेको छ।
बोर्डका दीर्घकालीन योजनाहरू पनि तीव्र गतिमा अघि बढिरहेका छन्। चलचित्र विधेयक संसद्मा पेस भएको छ, बनेपामा अत्याधुनिक इनडोर छायाङ्कन स्टुडियो निर्माणको प्रक्रिया चलिरहेको छ, बक्स अफिस प्रणाली कार्यान्वयनको अन्तिम चरणमा छ, र अनलाइन सेवा वैशाखमै उद्घाटन हुने तयारीमा छ। यस्तै, इलाममा बाल चलचित्र महोत्सव आयोजना हुने घोषणाले बोर्डको बहुआयामिक दृष्टिकोणलाई झल्काउँछ।
यी पहलहरूले नेपालको चलचित्र क्षेत्रलाई नयाँ उचाइमा पुर्याउने मात्र नभई कर्णालीजस्ता सम्भावनायुक्त क्षेत्रलाई विश्वको कथावाचनको केन्द्र बनाउने सपना बोकेका छन्। राराको रमणीय काखबाट सुरु भएको यो यात्राले नेपालको सांस्कृतिक र पर्यटकीय समृद्धिलाई नयाँ आयाम दिने विश्वास गरिएको छ।
