खस भाषा र सभ्यताको उद्गमस्थल ऐतिहासिक सिंजा उपत्यकामा पहिलो पटक आयोजना हुने बृहत् सिंजा महोत्सवको उद्घाटन प्रतिनिधिसभाकी उपसभामुख इन्दिरा राना मगर र सांसद ज्ञानेन्द्र बहादुर शाहीले गर्ने भएका छन्।
सिंजा सञ्चार केन्द्रको आयोजनामा वैशाख १२ देखि २१, २०८२ सम्म सञ्चालन हुने प्रथम सिंजा महोत्सवको उद्घाटनका लागि उपसभामुख राना प्रमुख अतिथिका रूपमा उपस्थित हुने पक्का भएको आयोजक संस्थाका अध्यक्ष मोहन विक्रम शाहीले जानकारी दिए। उनका अनुसार, जुम्लाबाट निर्वाचित प्रतिनिधिसभा सदस्य तथा राष्ट्रिय प्रजातन्त्र पार्टी (राप्रपा) संसदीय दलका सचेतक ज्ञानेन्द्र बहादुर शाही विशेष अतिथिका रूपमा सहभागी हुनेछन्।
यो महोत्सवले सिंजा क्षेत्रको पर्यटन प्रवर्द्धन, व्यापारिक गतिविधिमा वृद्धि र सांस्कृतिक सम्पदाको संरक्षणमा महत्त्वपूर्ण योगदान पुर्याउने अपेक्षा गरिएको छ। आयोजकका अनुसार, महोत्सवमा चर्चित कलाकारहरू पल शाह, दुर्गेश थापालगायत दर्जनौं कलाकारको प्रस्तुति रहनेछ, जसले दर्शकलाई मनोरञ्जन प्रदान गर्नेछ।
“सिंजा उपत्यकाको ऐतिहासिक र सांस्कृतिक महत्त्वलाई राष्ट्रिय तथा अन्तर्राष्ट्रिय स्तरमा चिनाउन यो महोत्सव कोसेढुंगा साबित हुनेछ,” अध्यक्ष शाहीले भने। “हामीले पर्यटन, व्यापार र स्थानीय संस्कृतिको प्रवर्द्धनलाई प्राथमिकता दिएका छौं।”
वैशाख १२ गतेदेखि सुरु हुने यो महोत्सव १० दिनसम्म सञ्चालन हुनेछ। महोत्सवमा स्थानीय उत्पादनको प्रदर्शनी, सांस्कृतिक कार्यक्रम, र खस सभ्यतासँग सम्बन्धित विभिन्न गतिविधिहरू समेटिनेछन्। सिंजा गाउँपालिकाले पनि महोत्सवलाई सफल बनाउन सहयोग गर्ने प्रतिबद्धता जनाएको छ।
यो महोत्सवले जुम्लाको पर्यटकीय सम्भावनालाई उजागर गर्नुका साथै स्थानीय समुदायको आर्थिक विकासमा टेवा पुर्याउने विश्वास गरिएको छ।
