विगत १२ वर्षदेखि क्लिनिकल फार्माकोलोजीमा अध्यापन, अनुसन्धान र नेतृत्वमा सक्रिय डा. धामी कर्णाली स्वास्थ्य विज्ञान प्रतिष्ठानमा सह–प्राध्यापक र रेक्टरको भूमिकामा छन्। उनको मृदुभाषी स्वभाव, समयपालन, र प्रभावकारी सञ्चार सीपले सबैको मन जितेको छ।
कर्णाली स्वास्थ्य विज्ञान प्रतिष्ठान जुम्लामा आफ्नो रिक्त उपकुलपति पदमा शिक्षाध्यक्ष डा. डबल बहादुर धामीलाई नियुक्त गरिएको छ। उनलाई स्वास्थ्य मन्त्री प्रदीप पौडेलको सिफारिसमा प्रधानमन्त्री केपी शर्मा ओलीले निमित्त उपकुलपतिको जिम्मेवारी सुम्पिएका छन्।
डा. धामीको सुदूरपश्चिमको बझाङ जिल्लाको छबिस पाथीभरा–५, थलारामा १९८४ मा एक सामान्य किसान परिवारमा जन्मिएका धामीले बाल्यकालदेखि नै मेधावी विद्यार्थीको पहिचान बनाएका थिए। बझाङमा एसएलसी टप गरेर उनले आफ्नो शैक्षिक यात्राको बलियो जग बसाले।
अमृत साइन्स क्याम्पसबाट आइएस्सी पूरा गरेपछि उनले २००९ मा बीपी कोइराला स्वास्थ्य विज्ञान प्रतिष्ठान, धरानबाट दन्तशल्य चिकित्सकको उपाधि हासिल गरे। त्यसपछि, २०१४ मा काठमाडौं विश्वविद्यालयअन्तर्गत नेपालगञ्ज मेडिकल कलेजबाट क्लिनिकल फार्माकोलोजी र थेराप्युटिक्समा एमडी गरेर उनले आफ्नो विशेषज्ञता विस्तार गरे।
विगत १२ वर्षदेखि क्लिनिकल फार्माकोलोजीमा अध्यापन, अनुसन्धान र नेतृत्वमा सक्रिय डा. धामी कर्णाली स्वास्थ्य विज्ञान प्रतिष्ठानमा सह–प्राध्यापक र रेक्टरको भूमिकामा छन्। उनको मृदुभाषी स्वभाव, समयपालन, र प्रभावकारी सञ्चार सीपले सबैको मन जितेको छ।
डा. धामीले दन्त चिकित्सकको रूपमा सुदूरपश्चिमका विभिन्न क्षेत्रमा सेवा प्रदान गरेका छन्। साथै, नेपाल डेन्टल एसोसिएसन, नेपाल मेडिकल एसोसिएसन, र नेपालको फार्माकोलोजिस्ट सोसाइटीका सदस्यका रूपमा उनले स्वास्थ्य क्षेत्रमा महत्त्वपूर्ण योगदान पुर्याएका छन्।
कर्णाली स्वास्थ्य विज्ञान प्रतिष्ठानले विगत एक दशक बढी समयदेखि कर्णाली क्षेत्रको स्वास्थ्य र शैक्षिक सुधारमा महत्त्वपूर्ण भूमिका खेल्दै आएको छ। २०११ मा स्थापित यो प्रतिष्ठानले ३०० शय्याको अस्पताल सञ्चालन गर्दै जुम्ला, हुम्ला, डोल्पा, कालिकोट, मुगु, जाजरकोट, बाजुरा, बझाङ, र अछामका बासिन्दालाई गुणस्तरीय स्वास्थ्य सेवा प्रदान गरेको छ।
हालै एमबीबीएस र एमडी कार्यक्रमहरू सञ्चालनमा ल्याएर प्रतिष्ठानले चिकित्सा शिक्षामा पनि फड्को मारेको छ। “यो नियुक्ति हाम्रो क्षेत्रको लागि ऐतिहासिक अवसर हो,” जुम्लाका स्थानीय अमृत भण्डारी भन्छन्, “डा. धामीको नेतृत्वमा प्रतिष्ठानले नयाँ उचाइ प्राप्त गर्नेछ।”
स्वास्थ्य मन्त्री पौडेलले पनि डा. धामीको अनुभव र समर्पणले कर्णालीको स्वास्थ्य र शिक्षालाई थप समावेशी र प्रभावकारी बनाउने विश्वास व्यक्त गरेको बताए।
डा. धामीको नेतृत्वमा प्रतिष्ठानले सामना गर्नुपर्ने केही चुनौतीहरू पनि छन्। स्रोत–साधनको कमी, दक्ष जनशक्तिको अभाव, र कर्णालीको भौगोलिक जटिलताले शैक्षिक र स्वास्थ्य कार्यक्रम सञ्चालनमा बाधा पुर्याउन सक्छ।
तर, डा. धामीको सर्जनात्मक दृष्टिकोण र सहकार्यको भावनाले यी चुनौतीहरूलाई अवसरमा बदल्ने अपेक्षा गरिएको छ। उनको योजना छ, “हामीले कर्णालीका हरेक गाउँमा गुणस्तरीय स्वास्थ्य र शिक्षा पुर्याउनेछौं, ताकि यहाँका बासिन्दाले बाहिर जानु नपरोस्।”
