मन्त्री बलराम अधिकारीले यो कार्यालय स्थापनाले सिंजा क्षेत्रलाई आर्थिक र प्रशासनिक रूपमा ठूलो सफलता प्रदान गरेको बताए। उनका अनुसार, यो कदमले खस भाषाको उद्गमस्थलका रूपमा प्रसिद्ध सिंजा क्षेत्रमा विकासको नयाँ युगको सुरुवात गरेको छ।
जुम्लाको ऐतिहासिक सिंजा क्षेत्रमा एक ऐतिहासिक उपलब्धी हासिल भएको छ। संघीयताको मर्मअनुसार अब सिंजा क्षेत्रका हिमा, सिंजा र कनकासुन्दरी गाउँपालिकाका नागरिकले घरआँगनमै नापी र मालपोत सेवाको सुविधा पाउने भएका छन्।
शुक्रबार भुमि व्यवस्था, सहकारी तथा गरिबी निवारण मन्त्री बलराम अधिकारीले सिंजा गाउँपालिकाको नराकोटमा स्थापना गरिएको नापी र मालपोत कार्यालयको औपचारिक उद्घाटन गरेसँगै स्थानीयवासीमा खुसीको लहर छाएको छ।
उद्घाटन समारोहमा मन्त्रीसहितको टोलीलाई सिंजावासीले परम्परागत पञ्चेबाजासहित भव्य स्वागत गरेका थिए। यो कार्यालय स्थापनाले सिंजा क्षेत्रका नागरिकलाई सदरमुकाम धाउनुपर्ने झन्झट र महंगो खर्चबाट मुक्ति मिलेको छ।
अघिल्लो सरकारका समयमा कानुनी जटिलताका कारण रोकिएको यो परियोजनालाई प्रधानमन्त्री केपी शर्मा ओली नेतृत्वको सरकारले प्राथमिकतामा राखी सिंजाली जनताको माग पूरा गरेको हो। गत पुस ९ गतेको मन्त्रिपरिषद्को निर्णयले यो कार्यालय स्थापनाको बाटो खोलेको थियो, जसका लागि करिब २१/२२ पटक प्रयास भएका थिए।
सिंजाका स्थानीयवासीहरूले यो निर्णयलाई संघीयताको अनुपम उपहारका रूपमा स्वागत गरेका छन्। सिंजा-६ गोराका मोति दमाईले भने, “अब हामीलाई सदरमुकाम जानुपर्दा लाग्ने समय, पैसा र हप्तौं होटल बसाइको पीडा हटेको छ। घरमै बसेर सेवा लिन पाउनु हाम्रो लागि ठूलो राहत हो।”
स्थानीय तिलाचन्द्र चौलागाँईले यो सफलतालाई सिंजा क्षेत्रको ऐतिहासिक उपलब्धी करार दिँदै भने, “जग्गा नामसारी, राजिनामा जस्ता कामका लागि बुढापाकाले भोग्नुपरेको दुःख अब अन्त्य भएको छ। यो वास्तवमै हाम्रो क्षेत्रका लागि ठूलो खुसीको क्षण हो।”
मन्त्री बलराम अधिकारीले यो कार्यालय स्थापनाले सिंजा क्षेत्रलाई आर्थिक र प्रशासनिक रूपमा ठूलो सफलता प्रदान गरेको बताए। उनले कार्यालयको दिगो व्यवस्थापन र प्रभावकारी सेवा प्रवाहका लागि सरकारले आवश्यक सहयोग जारी राख्ने प्रतिबद्धता जनाए। उनका अनुसार, यो कदमले खस भाषाको उद्गमस्थलका रूपमा प्रसिद्ध सिंजा क्षेत्रमा विकासको नयाँ युगको सुरुवात गरेको छ।
सिंजामा नापी र मालपोत कार्यालय स्थापनाले स्थानीयवासीको दैनिकी सहज बनाउनुका साथै संघीयताको सही अर्थ र मर्म बुझ्ने सरकारको संकल्पलाई पनि प्रष्ट पारेको छ। अब सिंजा क्षेत्रका नागरिकले समय, पैसा र शारीरिक श्रम जोगाउँदै घरआँगनमै सरकारी सेवा पाउनेछन्, जसले उनीहरूको जीवनस्तरमा सकारात्मक प्रभाव पार्नेछ।
