जुम्लाका युवाले आफ्नो अधिकार र कर्तव्यप्रति सचेत भई पार्टी, संघसंस्था र स्थानीय निर्णय प्रक्रियामा सक्रिय भूमिका निर्वाह गर्नुपर्छ। सही नेतृत्वमा पुग्न युवाले केवल विरोध होइन, समाधानका वैकल्पिक दृष्टिकोण पनि प्रस्तुत गर्नुपर्छ।
हरेक वर्ष अगस्ट १२ मा विश्वभर अन्तर्राष्ट्रिय युवा दिवस मनाइन्छ। सन् १९९९ मा संयुक्त राष्ट्रसंघले सुरु गरेको यो दिवसले युवाको क्षमता, सृजनशीलता र योगदानप्रति जनचेतना फैलाउनुका साथै उनीहरूको समस्या समाधान र नीति निर्माणमा नयाँ दृष्टिकोण दिन्छ।
नेपालको भौगोलिक रूपमा दुर्गम र विकासमा पछाडि परेका जिल्लामध्ये जुम्लाका लागि यस दिवसको महत्त्व अझ गहिरो छ। जुम्लाका युवा परम्परागत रूपमा साहस, धैर्यता र संघर्षको प्रतीकका रूपमा परिचित छन्।
विगतमा उनीहरूको जीवन मुख्यत: कृषि र पशुपालनमा आधारित भए पनि पछिल्ला वर्षहरूमा आधुनिक शिक्षा, सीप र प्रविधि आत्मसात गर्ने लहर बढ्दै गएको छ। यद्यपि, सीमित शैक्षिक पूर्वाधार, स्वास्थ्य सेवाको कमी, रोजगारीको अभाव र भौगोलिक कठिनाइ अझै पनि उनीहरूको प्रगतिको बाटोमा प्रमुख अवरोध बनेका छन्।
अन्तर्राष्ट्रिय युवा दिवसले उत्सव मात्र होइन, आत्ममूल्यांकनको अवसर पनि दिन्छ। जुम्लाका युवाले आफ्नो व्यक्तिगत सपना साकार गर्ने प्रयाससँगै जिल्लाको समृद्धि र दिगो विकासलाई पनि प्राथमिकता दिन जरुरी छ।
कृषि सुधार, उद्यमशीलता, सूचना प्रविधि, पर्यटन प्रवर्द्धन, तथा सामाजिक सेवामा सक्रिय भई उनीहरूले जिल्लामा क्रान्तिकारी परिवर्तन ल्याउन सक्छन्। स्थानीय स्रोतसाधनको सदुपयोग र आधुनिक सीपको समन्वय गर्न सके मात्र जुम्लाको दिगो विकास सम्भव छ।
राजनीतिक क्षेत्रमा युवाको सक्रिय र समावेशी सहभागिता अपरिहार्य छ। लोकतन्त्रलाई सुदृढ बनाउन र सामाजिक न्याय कायम राख्न युवा नेतृत्वको भूमिका अत्यन्त महत्त्वपूर्ण हुन्छ।
जुम्लाका युवाले आफ्नो अधिकार र कर्तव्यप्रति सचेत भई पार्टी, संघसंस्था र स्थानीय निर्णय प्रक्रियामा सक्रिय भूमिका निर्वाह गर्नुपर्छ। सही नेतृत्वमा पुग्न युवाले केवल विरोध होइन, समाधानका वैकल्पिक दृष्टिकोण पनि प्रस्तुत गर्नुपर्छ।
युवाको क्षमता उपयोगका लागि सरकार, स्थानीय निकाय र गैरसरकारी संस्थाहरूले लक्षित कार्यक्रम सञ्चालन गर्नुपर्छ। सीप विकास तालिम, स्वरोजगारका अवसर, स्वास्थ्य सेवा पहुँच विस्तार र शिक्षा सुधारमार्फत युवालाई सशक्त बनाउन सकिन्छ।
जब युवा आफ्नो सीप र ऊर्जा उपयोग गर्न सक्षम हुन्छन्, तब उनीहरू मात्र आफ्नो जीवनस्तर होइन, जिल्लाको आर्थिक-सामाजिक संरचनामा पनि सकारात्मक परिवर्तन ल्याउन सक्छन्।
जुम्लाका युवाले एकताबद्ध भएर काम गर्दा सामाजिक असमानता, गरिबी र अवसरको अभावजस्ता चुनौती पार गर्न सकिन्छ। यसका लागि राजनीतिक सचेतना, आर्थिक आत्मनिर्भरता र सामाजिक उत्तरदायित्वको भाव आवश्यक छ।
अन्तर्राष्ट्रिय युवा दिवसले हामीलाई सम्झाउँछ। युवा शक्ति नै राष्ट्रको सबभन्दा ठूलो सम्पत्ति हो। यस अवसरमा जुम्लाका सबै युवालाई हार्दिक शुभकामना।
तपाईंहरूको जोश, प्रतिभा र सिर्जनशीलता मात्र होइन, प्रेम, समझदारी र प्रतिबद्धताले पनि जुम्लालाई समृद्ध बनाओस्। युवा सशक्तिकरणमार्फत जुम्लाको उज्यालो भविष्य निर्माणमा हामी सबै अग्रसर बनौं।
