१
मेरो बस्तीमा कहिँले विद्रोहको लाम लाग्ला सोचिरहेछु
शिक्षित भएको जन पनि कसरी काम लाग्ला सोचिरहेछु
स्वास्नीको सेवा गर्दा नामर्द उपनाम दिने यो समाजको
खै कहिँले? अन्धकारको घैटौंमा घाम लाग्ला सोचिरहेछु
२
चोट मनभित्र छ रोदन मनभित्र छ, देखाउन सक्दिनँ म
यो संसार पनि यस्तो विचित्र! छ, देखाउन सक्दिनँ म
सुखमा खुब साथ दिन्छ, दु:खमा त हराउँछ एकाएक,
मेरो साँच्चै एक शत्रु जस्तै मित्र छ, देखाउन सक्दिनँ म
३
थोपाथोपा मिलेर नै समुद्र बन्छ, यो नबिर्सनू
कमिला देखेर हात्ती पनि तर्सन्छ, यो नबिर्सनू
यात्रामा ढुङ्गाले ठेस लाउँदैमा गन्तव्य बिर्सिइन्न
भन्नलाई त दुश्मनले अनेकौं भन्छ, यो नबिर्सनू।
४
मरेपछि चितामा जल्दिनँ भन्न कसरी पाउँछ
शोकमा बलेको दियो बल्दिनँ भन्न कसरी पाउँछ
यो त पालना गर्नैपर्ने नियम बनेको हो संसारमा
आयु पुगेपछि रुखले ढल्दिनँ भन्न कसरी पाउँछ
